කළු කම්බිලි 16
දරුවා ලැබුණි හරි හුරතල් චූටි පුතෙක්
කාලය ගෙවුණි කොළුවා දැන් ලොකුයි ටිකක්
සියපුතු බිසෝ හමුවේ පැවසීය දිනක්
අම්මේ බඳිමි මම මැණිකේ නොදී දුකක්
මොනවද පුතේ මේ දොඩවන බහුබූත
ඇය ගැහැණියකි දරුවෙකු ඇති අවජාත
මව කෑගැසූ මුත් විලසට අවිනීත
පුතු දිගු කළා අසරණියට තම දෑත
සැපතෙදි ළඟින් හිඳ ව්පතෙදි හැරයාම
පෙන්වා නැතිය මට මා දත් බුදු දහම
දරුවට පියා වී වෙනසක් නොකරාම
මම ඔබ රකිමි ආදරයෙන් පෙරසේම
දෙවියෝ අදහන්නෙ මිනිසුන් විතරමය
දෙවියෝ පුදන්නෙත් මිනිසුන් විතරමය
දෙවියෝ කියන්නේ පිලිරූ විතරමය
දෙවියෝ සිටින්නෙත් මිනිසුන් අතරමය
ලොකුපුතු ගියා දුරු රටකට මැණිකෙ බැඳ
රැකියාවකිය දියණිය ලොකු තැනක හොඳ
පිළිකුල්මය උන්ට දන්නා කලෙක හිඳ
දේවාලයයි දුම්මල වල පුළුටු ගඳ
බීලම ඉදිමිලා දියවී අක්මාව
මරුවා ගෙනගියා වැහැරුණු සයිමාව
දරුවොත් හැරගියෙන් ගම හා අම්මාව
තනිකම බිසෝ වටකෙරුවා නොපමාව
ගැමියෝ වැඩකරපු කැත්තේ උදැල්ලේ
පොළොවේ වැළලිලා දැන් පස් පිඩැල්ලේ
ඇත්තේ පරපුරකි නව ගම් ගොඩැල්ලේ
මැස්සෝ වසති දේවාලෙත් නිදැල්ලේ
වැළඳී අංශබාගය දැන් බිඳී බලේ
වැතිරී බිසෝ ලතවෙයි ලණු ඇඳෙහි පිලේ
කඹුරණ දායි කළු කම්බිලි උදව් කළේ
අරුණය ගායි තෙල් තාමත් උකුල් තලේ
..........................නිමි...........................ශාරා
පුරහඳ ගෙවීගෙන යන සේ අමාවකින්
කළු කම්බිලිද සැරසූවෙමි නිමාවකින්
වරදක් ඇතොත් පිළිගෙන මා සමාවකින්
හමුවෙමු යළිත් ළඟදිම රස කතාවකින්
කළු කම්බිලිය හා මෙතුවක් ළඟින් සිටි
අමතමි සැවොම තව එක වදනකින් කෙටි
මා කවියෙකිය පොඩි හෙබි සිරුරකින් මිටි
ඔබෙ වචනයක් මට මහමෙර තරම් වටි
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment