කවි කියවන්න ආව අය

Thursday, November 15, 2018

මහිලා සමිතිය

-----මහිලා සමිතිය--------

මිතුරී සංසදය ගම්පහ මහිලාවේ
ළඟදී රැස්වුණා හරි සිරියකි පෑවේ
නෙක නෙක මෝස්තර නව ලොව වනිතාවේ
විලවුන් සුවඳ සුරලොව මයි සිහිවූවේ

රූමත් කතකි හෙබැවූයේ මුල් අසුන
ගැබ්බර බවකි දිස්වූයේ ඇගෙ දසුන
කියවන්නට වීය ඇය අත රැඳි හසුන
සක් දෙවි වෙතට යොමුකර ඇති බව ඇසිණ

සක් දෙවියනේ අම්මට විලි රුදාවයි
කැක්කුම තාත්තට නෑ උන් උජාරුයි
දිව ඇස යොමා විසඳනු ඔබ උදාරයි
අත් පුඩි ගැසූ හැම ගැබ්ගෙන හමාරයි

පඬු පුල් අසුන උණු විය විසඳුම ලැබුණා
මින් පසු පියාවෙත ඒ කැක්කුම හැරුණා
සැමගේ උඩඟු සිත සිනහව තුළ තිබුණා
සභා තොමෝ සතුටින් යන්නට යෙදුණා

ආරංචියට සැමියන් සවනත වැකුණු
ගත සිත සමග ඔළු ගෙඩියද හිරි වැටුණු
මමනම් අදින් පසු නෑ අඹුසැමි මිථුනු
කිව්වෝ සමහරෙකු මර බයටම දැනුණු

දින සති ගෙවී කාලය ළඟටම ආවා
මහිලා සභාපතිනිට  දින ලං වූවා
නියමිත දවසෙ ඇය රෝහල් ගත වූවා
රෑ දරු ප්‍රසූතිය වෙයි දොස්තර කීවා

සැමියා බයේ වේව්ලයි කිය කිය කරුමේ
සක්දෙවි කර කැවූ දුක දැන් පිය උරුමේ
අවසන් මොහොත තුළ සිදුවිය මේ අරුමේ
බෙරිහන් දුන්නෙ කාරෙක එළවන “ධර්මේ”
---------------------------------------ශාරා

ශාන්ත රාජපක්ෂ කිවිඳුන්ගේ නිර්මාණයකි.

මජ්ජ පමා දට්ඨානා

මජ්ජ පමා දට්ඨානා

දහවල් දානයක් මහ සඟනුන් වඩින
මා සගයෙකුගෙ නිවෙසක ඊයේ තිබින
ඉහළම වතාවත් මැද කන් අඩි පැළෙන
ගුණ ගායනා වැලඳිමට පෙර ගැයින

දානය බෙදෙයි කඩිසර මසවුළෙන් රස
තව පැත්තකින් පිළියෙල වෙයි අතුරු පස
මේ අත‍රේම ගේ අසලම රියෙක යස
ඩිකියෙක යමක් හා වටවිය මිතුරු රැස

සඟ වා  ගෙනෙති කට්ලට් හා මාළු බැදුම්
වීදුරු ගැටෙති රහසේ නැත නැටුම් ගැයුම්
උගුරක් ගසා මිතුරා දී සෙවුම් බැලුම්
සිගරැට් දුමද පලවා දුනි අතින් රිදුම්

ඔහුගේ පුතුද සිව් වසරක් වියැති දඟ
කෙළි සෙල්ලමේ යෙදෙමින් සම වයසෙ හුඟ
සුමිතුරු කැලක් හා අරලිය ගසක නැග
මේ දෙස විපරමින් පසුවිය ටිකක් ළඟ

වළඳා අවසනදි මහ සඟ රුවණ දන
පැමිණිය හැමෝටම පින්පෙත් පුදන මෙන
ඇරයුම් කළෙන් තම සැමියා සොයාගෙන
එළියට බැසී" මේ ඇහුනද "කියාගෙන

හුටා කියා බයිටුයි කොට එහිම දමා
කාරා කෙළ ගසා සැම හා මිතුරු තුමා
සදහම් උපාසක ලීලෙන් සිරස නමා
ඉඳගත්තේය සාලෙන් ඇයි පිනට පමා

අනුකරණය කළා පොඩිවුන් වැඩිහිටියෝ
කැරකී ගියා දෙක වදිනා විට පැටියෝ
දල්වා දුම්වැටිද සේ වාරුව නැතියෝ
බෝතල‍යත් රැගෙන මුන් සාලෙට වැඩියෝ

බෝතලෙ අඩක් වීදුරුවට ඇලවීය
සිගරැට්ටුවට ලයිටරයත් එක්වීය
මේ දුටු මව් පියන්ගේ කන් රත්වීය
ගහු ලොකු සාදු කියමින් පිළිගැන්වීය

වූ දේ පෙනේ ඉන්පසු මට තවත් මැවී
රැස්වූ සියල්ලෝ මුහුණට මුහුණ පෙවී
ලොකු සාදුගේ බණ දෙකනට අගුල් යැවී
ඒ ගැන ලියන්නට මා ළඟ නොමැත කවී
..............................................ශාරා

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 16 අවසාන කොටස

කළු කම්බිලි 16

දරුවා ලැබුණි හරි හුරතල් චූටි පුතෙක්
කාලය ගෙවුණි කොළුවා  දැන් ලොකුයි ටිකක්
සියපුතු බිසෝ හමුවේ පැවසීය දිනක්
අම්මේ බඳිමි මම මැණිකේ නොදී දුකක්

මොනවද පුතේ මේ දොඩවන බහුබූත
ඇය ගැහැණියකි දරුවෙකු ඇති අවජාත
මව කෑගැසූ මුත් විලසට අවිනීත
පුතු දිගු කළා අසරණියට තම දෑත

සැපතෙදි ළඟින් හිඳ ව්පතෙදි හැරයාම
පෙන්වා නැතිය  මට මා දත් බුදු දහම
දරුවට පියා වී වෙනසක් නොකරාම
මම ඔබ රකිමි ආදරයෙන් පෙරසේම

දෙවියෝ අදහන්නෙ මිනිසුන්  විතරමය
දෙවියෝ  පුදන්නෙත් මිනිසුන්  විතරමය
දෙවියෝ කියන්නේ පිලිරූ විතරමය
දෙවියෝ සිටින්නෙත් මිනිසුන්  අතරමය

ලොකුපුතු ගියා දුරු රටකට මැණිකෙ බැඳ
රැකියාවකිය දියණිය ලොකු තැනක හොඳ
පිළිකුල්මය උන්ට දන්නා කලෙක හිඳ
දේවාලයයි දුම්මල වල පුළුටු ගඳ

බීලම ඉදිමිලා දියවී අක්මාව
මරුවා ගෙනගියා වැහැරුණු සයිමාව
දරුවොත් හැරගියෙන් ගම හා අම්මාව
තනිකම බිසෝ වටකෙරුවා නොපමාව

ගැමියෝ වැඩකරපු කැත්තේ උදැල්ලේ
පොළොවේ වැළලිලා දැන් පස් පිඩැල්ලේ
ඇත්තේ පරපුරකි නව ගම් ගොඩැල්ලේ
මැස්සෝ වසති දේවාලෙත් නිදැල්ලේ

වැළඳී අංශබාගය දැන් බිඳී බලේ
වැතිරී බිසෝ ලතවෙයි ලණු ඇඳෙහි පිලේ
කඹුරණ දායි කළු කම්බිලි උදව් කළේ
අරුණය ගායි තෙල් තාමත් උකුල් තලේ
..........................නිමි...........................ශාරා

පුරහඳ ගෙවීගෙන යන සේ අමාවකින්
කළු කම්බිලිද සැරසූවෙමි නිමාවකින්
වරදක් ඇතොත්  පිළිගෙන මා සමාවකින්
හමුවෙමු යළිත් ළඟදිම රස කතාවකින්

කළු කම්බිලිය හා මෙතුවක් ළඟින් සිටි
අමතමි සැවොම තව එක වදනකින් කෙටි
මා කවියෙකිය පොඩි හෙබි සිරුරකින් මිටි
ඔබෙ වචනයක් මට මහමෙර තරම් වටි

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 15

කළු කම්බිලි 15

මේකා  මෙතෙක් කල් මට කළ රඟපෑම
එළිවිය දෙවියනේ මගෙ ඉදිරියෙදීම
ගිගිරූ ලතාගේ ඇස් වල දිලිසීම
පිළිබිඹු  කළා පිහිතලයේ ලෙළදීම

පළවෙනි ඉලක්කය උගෙ ගෙල පිටුපසට
බුදු අක්කේ කියාගෙන මූ මරබයට
වැඳ වැටුනාට ඇනගෙන දණ දෙක බිමට
ඊළඟ පහර බෙදුවා හිස පළු දෙකට

ලේ වගුරවාගෙන ඌ මිහිකත බැදුවා
සිහි එළවූ දෝණි දේවාලෙට දිව්වා
ලොකු නැන්දා බිසෝ ඒකිව සැනසෙව්වා
විස්තර එකින් එක හෙමි හෙමිහිට ඇහුවා

මියැදුණු උගෙ සිරුර තිබුණා ගේ ඇතුළේ
බියකරු දසුන කාගෙත් හදවත සසැලේ
සැඟවිනි දැයි ලතා සෙව්වත් වන වදුලේ
ඇඳිවත හමුවුණා පාවෙන ලිං පතුළේ

මරණෙත් මිනීමරුවත් යන දෙකම මළා
නඩුවත් උසාවිය දැම්මා ඉවත හළා
පොඩිඋන් දෙපොළ පරිවාසෙට බාර කළා
මැණිකේ ඇදුණි ලොකු නැන්දගෙ සෙවන බලා

ගමේ ගොඩේ කතිකා වුණි මෙහෙම දෙයක්
ලතා ජින්න උඩ පැන්නා මරණ තුණක්
එහා ගමේ රුවනි එක්ක ගියා දෙකක්
බිසෝ වරද්දා ගත්තොත් හබේ හබක්

දුවේ මෙහෙ ඉඳින් දරුවා ලැබෙන තුරු
අපේ එකා ගැන මුත් හිතනවා බොරු
ඇගේ නෙත් බිමට බරවිය කඳුළු පිරු
මොන අම්මටත් ලොකු කැක්කුම තමා දරු
................................................................ශාරා
දරුවා ලැබෙන තුරු රැකවරණයක් තියේ
ඉන්පසු කොහාටද හදවත ගැහෙයි බියේ
ඊළඟ කොටස ගැන කිසිවක් හිතට නොයේ
අවසානයද මන්දා  කළු කම්බිලියේ

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 14

කළු කම්බිලි 14

වෙනදට වඩා දේවාලේ සෙනග පිරේ
ඇස්වහ සාත්තර පොඩිවැඩ නතර කෙරේ
හදි හූණියම් වින බන්ධන මල්ල කරේ
මළකඩ කාය පැත්තක දෙහි කපපු ගිරේ

සෙල්ලං දූවෙ හත් මුහුදේ නොසිට වර
මරුවල්ලියේ වෙසමුණි අණ රැගෙන වර
තුංමංසලේ මළසොහොනේ දපා වර
කම්බිලි යකෝ බිලි පුද කැපගන්ඩ වර

යාදිනි මන්තරද මේවැනි කුරිරු පහේ
දේවාලේ ඇතුළෙ බිසොවගෙ මුවින් ඇහේ
දැහැමෙන් සෙමෙන් කටයුතු කළ පහුණු දොහේ
දෙවියන් නොවේ දැන් මේකිට යකා වැහේ

මල්ලිද සාත්තර මේ අතරේ ඔන්න
බැස්සා ලතාගේ ගේ ඇතුළේ බින්න
සෙල්ලං ඔක්කෝම දැම්මා මූ දන්න
ගැබ්බර දෝණියැන්දව වසඟෙට ගන්න

අදනම් කෝමහරි නම්මා ගනිමි සිතා
ඇරියා එදා ඔහු තනිවම පොලට ලතා
මොන කරුමයද මන්දා ආ ලෙසට පතා
මගදිම හැරී ආවා ඇය නිවස වෙතා

ඇතුළෙන් ඇහෙන සද්දෙට කන් යොමාගෙන
දොරපළුවේ හිඩැස වෙත ඇස ඔබාගෙන
ගලනා දහදියෙන් සියොළඟ තෙමාගෙන
සිටියා ලතා අණතුර දැන හැඳිනගෙන

දඟලනු එපා කෙල්ලේ උඹ අයිති මටයි
කුසතුළ ඉන්න දරුවාගේ පියා මමයි
කියමින් බැඳදමා දැරියගෙ අතයි කටයි
මේකා ඇයව පෙරළාගෙන යකා නටයි

සවනත වැකුණු මේ වදනින් ලහි ලහියේ
හෙලිවිය නියම හිමිකරු කළ වින්නැහියේ
ඉවසුම පැනගියෙන් ගිළිහුණු හොඳ සිහියේ
තදවිය සුරත මිට මත මන්නා පිහියේ
..........................................................ශාරා
ගැහැනියකගේ හිත මේ තරමට තදද
පිහියක් ගත්තාට ඕවා කළ හැකිද
කිපුනොත් හැපින්නක් කොහොමද දන්නවද
හරි සෙනසුරාදා වෙනකන් ඉවසමුද

ශාන්ත රාජපක්ෂ කිවිඳුන්ගේ නිර්මාණයකි

කළු කම්බිලි 13

කළු කම්බිලි  13

රුවනිගෙ පෙම්වතා දැන් ගෙදරට එනවා
දෙපොළෙම කසාදෙට සූදානම් වෙනවා
අපූරුවට මේ ජෝඩුව ගැලපෙනවා
දකින දකින අය නිතරම පවසනවා

දෙන්නා  එකටමයි යන්නේ  ගමන් බිමන්
දන්නා තැනෙක හැරියා යන අතරෙ ගිමන්
කතා කළේ තුරුළු වෙවී ඉන්න ගමන්
අනාගතේ තනනා හැටි සිහින විමන්

ප්‍රේම කරන්නේ මොටදෝ හොරෙන් හොරෙන්
නෑ තහනමක් දෙන්නාගෙම ගෙදර දොරෙන්
දුවේ නමුත් සමහර දේ අතේ දුරෙන්
තියා ගනින් මව කීවේ හිතාදරෙන්

ලංගම රියැදුරෙකි මොහු දුර සේවාවේ
සමහර විටෙක දින දෙකතුන රැකියාවේ
ඉඳහිට පාළුවට දුම්වැටියක් බීවේ
මත්පැන් උපන්තේකට නෑ කට ගෑවේ

යුධගිනි තදින් ඇවිලෙද්දී උතුරු කරේ
අවධානමෙනි බස් රිය ධාවනය කරේ
ක්ලේමෝවකිය සැඟවුණු කොටි එල්ල කරේ
පැනගත් අයගෙ ගෙල කපලයි ඉවර කරේ

මළකඳ තිබුණෙ මෝචරියේ හිස වෙන්ව
හඳුණාගත් රුවනි වැටුණා සිහිසුන්ව
හත් දා එළඹෙද්දි  දානෙත් වැඩ ලන්ව
ජීවිත දෙකක් තව තිබුණා අවසන්ව

තැනු මාලිගා සුළඟේ විසිරුණි වියැකි
රුවනිට වෙච්ච දේ අදහනු බැරි සෙයකි
දිවි තොර කළේ ගෙලවට එති සාරියකි
මියයන විටත් ඇය තුන්මස් ගැබිනියකි
...........................................................ශාරා
මේකත් බිසෝ දෙවියන්ගේ වැඩක් කියා
මුළු ගම්දනව්වම පීරා පැතිර ගියා
ඉන්පසු මිනිස්සුන් ආවේ බිසොව සොයා
වැඳගෙන නොවේ දෝතම හිස මුදුණෙ තියා

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 12

කළු කම්බිලි 12

උස්සා ගතිය දෝතට රූමත් කෙල්ල
නිව්වා කටින් පිඹලා පහනේ දැල්ල
සිත්සේ උරා බොද්දී යකු ලේ බිල්ල
ඇසුනා රැහැයියන්ගේ රෑ වැලපිල්ල

කිසිවක් නොවූසේ පසුදා උදේ රැයින්
යකැදුරු පිටවුණා සලකුණ තබා ලෙයින්
නොදැනම සිදුවුණත් ඇතිවූ කැලල මෙයින්
කළ හැකි නොවේ ඇගෙ ජීවිතයටම අයින්

වැඩ වෙන නමුදු ඉන්පසු විලසට පරණ
මොහු හට ලතා දැන් මළ කඳකිය මැරුණ
හිතයට ඇඳෙන්නෙම දියණිය ගැන තරුණ
නැත පාඩුවක් පාවා ගත්තත් සරණ

කැටලත් විනය නුහුළන මිහිකත අහස
සඟවාගෙන තමන් පමණක් දත් රහස
සිහියෙන් ලබන්නට නින්දෙදි ගත් පහස
මිනිහා කැස කවයි ගත කරමින් දවස

දින සති මාස ගොස් පාසැල ඇරී එදා
ගෙට ආ කෙල්ල බත් පතවත් නොකා නිදා
ගත්තා මෙන්න දෙපැයක් ගත වෙද්දි ඉඳා
හිටියා ගෙදර පිටිපස්සේ වමනෙ දදා

දුන්නා බඩේ ගායට ගොඩ බේත් තනා
හැන්දෑ වෙද්දි මොන හොඳදෝ ඇවිස්සුනා
තිබුණේ  සොච්චමයි ළඟ ඒ ටිකත් ගෙනා
වෙදනා හමුවෙන්න ටවුමට පිටත් වුණා

ලෙඩා බලා බහිනා තුරු වෙදා එළි
පිලේ බංකුවක් මත්තේ වෙලා ගුලි
සිටිය ලතාගේ හදවත ගියේ සැලි
දුටුව විටයි වෙදනාගේ නළලෙ රැලි
....................................................ශරා
ගැබ්ගති නොමේරූ හිරිමල් පියල්ල
කියපිය නොසඟවා සිදුවූ සියල්ල
ඉලපත් පහර ඇල්ලී පිට දැවිල්ල
බිසොවගෙ පුතා වෙත දිගුවෙද? ඇඟිල්ල

ශාන්ත රාජපක්ෂ කිවිඳුන්ගේ නිර්මාණයකි

කළු කම්බිලි 11

කළු කම්බිලි 11

පොල නැති සෑම සතියේ දින උදයේම
සිදුවෙයි සාත්තර මල්ලිගෙ පැමිණීම
ඉන්පසු ලතාගේ ගෙයි නොවරදවාම
ඇරඹෙයි දවල් වෙනතුරු දෙව්ලෝ යාම

පාසැල් නොගොස් ගේ අතුගාමින් සිටින
දියණිය දිනක් අහඹුව මුගෙ ඇස ගැටින
දුටුවොත් කෙනෙක් ආපසු හැරිලා බලන
රූමත් කෙල්ල දුටු මේකා ගල්  ගැහින

එදවස හැරී ගිය මුත් මූ පස්සෙන්දා
කෙල්ලව  බිලී බා ගන්නට අර ඇන්දා
වෙනදාටත් වඩා අම්මට පෙම් බැන්දා
ගැහුවා සැලසුමක් හරියාවිද මන්දා

දැම්මා හොරෙන් බත් හැලියට වැලි අහුරු
පිච්චී පිළිකන්නෙ විත් මහ රෑ කෙහුරු
ඌගෙන්මයි ඇහුවෙ මින් ගැලවෙන අයුරු
ඒකෙන් ඇතිවුණා පාසානම් පයුරු

හූනියමක්‍ ය කවුරුන් හෝ කරපු කලක්
අක්කේ මේ ගෙදර මළයක් විමානයක්
පිලියම ලෙස ඉහමි මතුරා වතුර ටිකක්
කළ යුතු වේය තුන්‍ යම සෙත් ශාන්තියක්

පැලකි පාන් මිදුලේ ගොක් කොළින් තැනූ
අටකි කොණක වත්තේ වලවල්ද කැනූ
සැවුලෙකි කැපූ කරමළ ලේ බිඳක් ඉනූ
බතෙකි පිසුණු එකටම හත් මාළු ඇනූ

මැදියම දක්වාම සිදුවිය මැතිරීම
ඉන්පසු නූල් අතුරා ඉරි පැන්නීම
අණතුරුවයි කළේ ගෙයි දුම් ඇල්ලීම
නිද්‍රාවකට පත්විය ඉන් ඔක්කෝම

ඇතෙක් ගැහැව්වත් මුන් ඇහැරෙනව බොරු
මෙන්න වෙලාවයි දැන් සැලසුමට මරු
මෙතෙක් කලක් රැකි පිරිසිදු පියුම සුරු
බලන් නරුමයෙකු නින්දෙන් බින්ද යුරු
..........................................................ශාරා
ළඳුණේ බලන් දුරදිග කම් සැපට පෙර
කිසිදාකවත් පර ඇසුරක් නොවෙති තිර
යයිදෝ කොහොම දියණිය ජීවිතේ දුර
බුදදා  බලමු සිදුවීමක් දුකෙන් බර

ශාන්ත රාජපක්ෂ කිවිඳුන්ගේ නිර්මාණයකි

කළු කම්බිලි 10

කළු කම්බිලි 10

දෙවොලට ආවෙ නෑ දැන් සතියක් අරුණ
මහ ගැටළුවක් විය බිසොවට මේ කරුණ
මගෙ වරදකුත් නැත වෙන කිසිවක් නොවින
එන ලෙස නොපමාව පණිවිඩයක් යැවින

සුදුමැලි වෙලා ඇඟ හොඳටම කෙට්ටු වෙලා
හුඹහෙන් ඇදල ගත්තෙකු මෙන් තලා පෙලා
බියකින් අරුණ බිසො අක්කට කිට්ටු කළා
මුහුණේ තිබුණි වියැළුණු කඳුළකුත් ගලා

සිදුවුණ සියලුදේ මුළ ඉඳලම කීවා
මුවගට බිසෝගේ මදහසකුත් ආවා
මට බොරු කළාටත් හොඳ පාඩම් මේවා
කියමින් ආදරෙන් ඔළුවත් අත ගෑවා

දෙවියන් හට කියමු අපි මේ අවනඩුව
කියමින් අස්වසා මොහු දුක් වී හැඬුව
සෙනෙහෙන් ළඟට ගෙන මිරිකා නැහැ පුඩුව
පළමුව පිරිමසා ගති සතියක අඩුව

පුරවා කල හතක් කහ දියරෙන් නෑවා
අල්ලා සුවඳ දුම් පහනත් දැල්ලූවා
කම්බිලි මස්සිනේ මල් යහනට වා වා
කියමින් බිසෝ ආරූඩෙන් කෑ ගෑවා

සූජානම් කොරාපිය මල් බුලත් තටු
ලදපස් මල්ද දිය ගොඩ මස් පුළුටු ගොටු
පුහුලක් සමග අග උල් කර පැඟිරි කටු
නම් දෙක ලියා ගහපන් එහි පහක් කොටු

පුහුලේ රුවකි මුල් කටු දෙක අත් දෙකට
ඉන්පසු පා යුගල හිල් කර හිස මතට
අන්තිම කටුව ගෙන දෑතම එකතු කොට
බැස්සී දෙබෑ වී යන ලෙස හදවතට

හිස ගස්සා බිසෝ සිහි මුර්චා වූවා
අරුණය ඇගෙ හිසේ තෙල් ඩිංගක් ගෑවා
විශ්වාසෙට ගන්ඩ අදහනු බෑ මේවා
පුහුලේ රුව කටින් ලේ බිඳුවක් ආවා
................................................ශාරා
වුනදේ දකිද්දී දැඩි බියකුත් දැනින
ඉක්මන් වුනා වැඩිදෝ අරුණට සිතින
බිසොවට උවමනා දේ සිදුවී තිබින
ශනිදා බලමු දඬුවම රුවනිට ලැබෙන

ශාන්ත රාජපක්ෂ කිවිඳුන්ගේ නිර්මාණයකි

කළු කම්බිලි 9

කළු කම්බ්ලි 9

"නෑවද අක්ක තාමත් දිය රෙද්ද ඇඟේ
නාමල් පුසුඹ නාහෙත් කිති කවයි මගේ
කෝමත් කෙල්ල මේකට තව හැඩයි වගේ"
කීවෙත් ආදරෙන් පිරිමැද නිකට ඇගේ

උගුරක් කෝපි බොමු මල්ලියෙ රස්නෙපිට
බෙහෙතකි ඒක මේ හීගතු සීතලට
කියමින් ගොඩවැදී ඇය මුළුතැන් ගෙයට
බත ලිප තබා ගත්තා කේතලෙ අතට

නිරුවත් උරහිසට රළු දෑතක් ආවා
ඇගෙ පිට ඔහුගෙ ලය මත්තට බරවූවා
ගෙල මත දිවෙන දෙතොලක උණුහුම වාවා
මුව ඉකියකට හුරු දිග සුසුමක් ලෑවා

ගිලිහුණි රෙද්ද පතිතව  පා පතුළ මත
විදුලිය දිවගියා නග්නවු සිරුර මත
ආරාධනය ‍රඳවා නෙතු පියන් මත
ඇය දිග ඇදුණි ඉඟිකර පන් පැදුර මත

කුසුමක රේණු පොඩිවෙද්දී බමර විතින්
ගගනත අකුණු විහිදෙව්වා සතර අතින්
දහදිය නැගෙද්දී පරයා සිසිල ගතින්
පෙනකැටි විසිරුණා ලිප මත පිසෙන බතින්

"ජීවිතයට නොලද මිහිරක් හිතට දැනේ
නොකියමි මුසාවක් මගෙ රත්තරං පනේ
අමතක කරනු බෑ මල්ලියෙ සත්තකිනේ
මම අද තමයි පිරිපුන් ගැහැණියක් වුනේ"

දොලහට කරකැවෙද්දී හෝරා යතුර
වට කීපයක දිගු හරඹෙද විය නතර
දිගටම ඇදහැළුණු මහවැසි මේ අතර
පෙරළා තිබුණි ගෙමිදුල විලකට වතුර

සමුදී පිටත් කර ඔහු ඇය ගෙට වැදුණා
නොතිබුණ පාළුවක් හදවතටම දැනුණා
ළමයින් එන්ට තව හෝරාවක් තිබුණා
සුව නින්දකට සැරසී පැදුරට වැටුණා

කොණ්ඩය බැඳ බැඳා නින්දෙන් අවදි වෙලා
වටපිට බලද්දී මහවැසි නතර වෙලා
දැඩි නියඟෙට කලක් මිදුලේ  එකතු වෙලා
කොළ රොඩු සියල්ලම තිබුණා සුද්ද වෙලා
.............................................................ශාරා
අමතක කරනු බැහැ අද සිදුවූ දේද
දිවියට නොලද මිහිරක් වින්දා නේද
නැවතත් සුහද හමුවෙන්නේ කවදාද
ඊළඟ බදාදා අපි නරඹමු .........හා..ද

ශාන්ත රාජපක්ෂ කිවිඳුන්ගේ නිර්මාණයකි.
.

කළු කම්බිලි 8

කළු කම්බිලි 8

ලතාගේ දුවයි බිසොවගෙ පුතාගෙයි
රහසේ ආලයත් දළු ලා වැඩී එයි
අම්මල අතර තිබුණත් වයිරයක් නයි
මුන්නේ ඇසුර අවිහිංසක එකක් මැයි

"මැණිකේ ඔයා කවදා හරි මගේ කර
ගන්නෙමි නංගියේ එය අධ්ටනකි තිර"
"මට නෑ ලෝකයක් අයියේ ඔබෙන් තොර"
හමු වූ විටදි දොඩමළු වෙයි හැඟුම් බර

දෙවියන් සමග නිතරම ගනුදෙනු කරන
මේ සම්බන්දෙ බිසොවට රහසක් නොවින
රූපෙට ඔබින ගුණ නුවණින් හෙබි තරුණ
කෙල්ලට ඇගෙත් හිත තුළ ඇල්මක් තිබින

අරුණව මගහරින දැන් ටිකටික රුවිනි
නව පෙම්වතා හා ආදරයෙන් බඳුණි
දෙදෙනා නිතර සිනමා හල වෙත ඇදුණි
ඔහුගේ උණුසුමට ඇගෙ සිත වහ වැටුණි

නොලැබේ පිළිතුරක් යවනා ලිපියකට
දැනුණා තදින් මෙය අරුණගෙ හදවතට
මුදු ලෙස තලන බමරෙකු මිස කුසුමකට
දැවටෙන සුළඟ ගැන නොනැගේ මතකයට

දැක්කා යනෙන මග සේරම දැනගත්තා
රැක්කා දිනක් රුවිනිව අල්ලා ගත්තා
අක්කා බිසෝ ගැන ඇය ඇදලා ගත්තා
ගේමත් දිනා ගෙන ප්‍රේමෙන් සමුගත්තා

ඇවිටිලි කළා අත අල්ලා නතර කර
ඇය අත ගසා දැමුවේ මොහු පුදුම කර
අවසානයේ සමුදුන්නේ කනට කර
පලිගන්නා බවට දිවුරා සපථ කර

පොල නැති දිනකි අද තනිවම ගෙදර ලතා
මොරසූරනා වැස්සෙත් ඉවරයක් නැතා
පිය ගැටෙනා හඬකි ඇසුනේ ළඟින් ඉතා
දොර ඇර බැලූ කල ඇගෙ නව සුපෙම්වතා
..............................................................ශාරා
නෑ දිය රෙද්ද තවමත් නැත උනාදා
වැසිබර උදය ඇත උණුසුම මකාදා
ගත කිති කවයි සිත නැගෙනා ප්‍රබෝදා
මේ මංගල්ලෙ නරඹමු සෙනසුරාදා

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 7

කළු කම්බිලි 7

හිමි මරණින් පසුව දරුවන් රැකීමට
නැතිවිය අන් මගක් අසරණ  ලතා හට
ගම්මණ්ඩියේ ගොස් එළවළු එකතුකොට
වික්කා පොලට ගෙනිහින් සුළු ලාබෙකට

වියපත් නොවුනු ඇහැකට කනකට පේන
කණවැන්දුමිය වෙත ඇස් දෙක රඳවාන
ලැබෙනා තුරු ඉඩක් දකිමින් පෙම් හීන
හිටියා කොබෙයියෙක් අනුකම්පා පාන

එළවළු කූඩෙ බා ගන්නට උදව් කරයි
ඉඳහිට තට්ටුවට ඇවිදින් පාළු මකයි
රූපය ඇඟ පසඟ අක්කගෙ හරිම හැඩයි
වැනුමට ප්‍රතිචාරෙ පෙමකට පාර කපයි

වාහේ මැරුණු දුක ටිකටික තුනී වෙලා
දෑසේ බැල්ම වුව මූණම එළිය කළා
දෝරේ ගලන හදවත තුළ ඉවුරු තලා
පාළුව ලතාටත් දැනුණා පඳුරු ලලා

වේලක් අතැර වේලක් කෑවත් බඩට
ගියෙ නෑ ලතා මෙතුවක් පර ඇසුරකට
එනමුත් මොහුගෙ ළඟ ඇති ඇඟලුම් කමට
හිත යට යමක් දළුලෑවා හීනියට

ඔහුගේ රැකියාව එකකිය අමුතු පෙලේ
සාත්තර කියයි එන මිනිසුන්ට පොලේ
උදයේ පටන් බැලුවොත් හෙම සෑම වෙලේ
පෝළිම හැදෙයි දික්කරගෙන දෙකේ කොළේ

කටකාරයි ටිකක් බැල්මෙන් මනමාලයි
වැඩියෙන් ලතාහට මොහු වයසින් බාලයි
අතමිට මුදල් ගැවසෙන්නේ පට ගාලයි
ගැහැණුන් රවට්ටන්නට මූ  හරි සූරයි

අක්කේ ගෙදර එන්ඩද මම වෙලේක
මල්ලියෙ ළමයි පාසැල් ගිය උදේක
ඇරයුම ඇරඹුමද මන්දා විනේක
හමුවත් යොදාගති ළඟදිම දිනේක
...............................................ශාරා
අනේ මන්ද යන යන තැන නටති මගුල්
පත්තු කරති සුරුට්ටු ගිනි ගද්දි රැවුල්
මොහොතේ සැප ජීවිතේම ශෝක තැවුල්
බලා ගමුකො බදාද මුන් කයිද පවුල්

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 6

කළු කම්බිලි 6

නිහඬයි දෙදෙනාම පිටවෙයි සුසුම් සිහින්
අදහස් මාරුවෙයි ගැටෙනා විටදි ඇහින්
දෙවියන්ටත් එදා සතුටට නින්ද ගිහින්
දේවාලෙත් වසා දැමුණා වේලපහින්

"දැන් රෑ බෝවෙලා නිදියාපන් කෙල්ලේ"
පැදුරත් එලා දුන්නා තිබු දොර මුල්ලේ
"වැඩ" කිය කියා මේකිත් පොතෙහිම එල්ලේ
ලේසිම නෑ රසය බැලුමට සැනසිල්ලේ

ඇඟ පත සෝදාන වැඩියෙන් වෙනදාට
වරලස කඩා ගල්වා සුවඳද ඊට
රෙද්දක් ඉනට පටලා මල් කහ පාට
නිරුවත් උඩුකයට පොරවා ගති රෑට

නිදි වර වරා නියපොතු සපම්න් එළියේ
අරුණත් පිලේ ලනු ඇඳ මත කල් හැරියේ
මැදියම් රැයත් පසුවී අන්තිම හරියේ
පමණය බිසෝ දෙවඟන එළියට වැඩියේ

"කෙල්ලත් මේ දැනුයි ගත්තේ දෑස පියා
හොඳ කාලයක් අපරාදේ ඉවත ගියා
මල්ලියෙ ගියා කියලයි මම හිතුවෙ ඔයා"
කියමින් බදා ගත්තා මුව දෑත අයා

ඉවතට දැමුණි රෙදිකඩ සිටි පොරවාන
ලෙළදුණි පයෝධර කිරි පාටැති පීන
මෙතුවක් එළිය විහිදා ලූ හඳපාන
සැඟවුනි මිතුනයට ඉඩකඩ සලසාන

ඇරඹුණි ගමම පසුවෙන මොහොතක නින්දේ
කල් දම දමා සිටියා වූ රති යුද්දේ
ලනු ඇඳ කිරිකිරිය යටකර මේ මැද්දේ
මතුවිය තෘප්තියේ දිගු කෙඳිරිලි සද්දේ

එළි වනතුරා රස ගඟුලේ කිමිදීලා
දාහය නිවාගෙන ඉඳුරන් පිනවාල
දෙදෙනා වෙන්වුණේ මේ හැම නිමවාලා
මළ මෑණියෝ හට සයිමගෙ පින්දීලා
................................................ශාරා
දෙදෙනා වෙන්වුණත් සමුගෙන සතුටු සිතින්
තවකෙකු බලා සිටියා මෙය උකුසු නෙතින්
හොරකම හොරාකෑමත් යන දෙකම ඉතින්
වරදකි බලමු වෙනදේ එන කොටස මතින්

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 5

කළු කම්බිලි 5

ජින්නා ගෙලකැඩී මරු හා එක් වීය
හැඬුමින් ලතාගේ ගම දෙවනත් වීය
දරු තිදෙනෙකු සමග අඹුවක් තනිවීය
මරණය බිසෝගේ ගිණුමට බැරවීය

නොගියත් බිසෝ මළගෙට අවලාද නිසා
වියදම් මුදල් දුන්නා ගණනක් නොඅසා
සයිමා දරු දෙදෙන පව්ලේ අය විලසා
වෙහෙසුනි දින හතම රෑ දාවල් නොලසා

ඉන්පසු අහල ගම්බිම් හද්දිග් භාගේ
රැස් විහිදුණා බිසොවගෙ ඊයක වේගේ
දේවාලයේ අවටින් යන කොයි කාගේ
අත් එසවුනා ඉහළට වැඳගෙන වාගේ

උණුසුම මැකී ගිය පසු මරණයෙ දිනෙක
ලොකු දුව ලතාගේ සුරතල් කිරිමැණික
ඇසටැස ගැටී හමුවී වත්තේ කොණෙක
පැටළුණි බිසෝගේ පුතු හා පෙම් දමෙක

ඇවිටිලි කළත් කපුකම අතහරින්නට
රුවණිට බැරිවුණා  අරුණව හදන්නට
වැනෙනා සිත ඔහේ ඔබ මොබ දුවනවිට
එබුණා කඩවසම් ගැටයෙකු ගමෙන් පිට

මේ අව් අස්සෙ සයිමගෙ මෑණියෝ මළා
බීගෙන මේක බෙරිහන් දුණි කදුළු සලා
කටයුතු කරණු කියමින් ගොස් නොපිරිහෙලා
ලොකු පුතු සමග මිනිහා ගම පිටත් කළා

තනිවිය  බිසෝ දෝණිය හා නිවසෙ එදා
ගැනගැන ඇඟිලි සිටි දවසක් වීය උදා
බාදක නැතිව විඳගන්නට මිහිර බෙදා
ඉවසිය යුතුයි ගන්නා තුරු කෙල්ල නිදා
.................................................ශාරා
ඉවසන දනා රුපු යුදයට ජයකොඩිය
දැන්නම් මේ වැකිය ඕනැවටත් වැඩිය
වේගෙන් ගැහේ දෙන්නාගෙම හිත්පොඩිය
බුදදා බලමු කනහැටි තහනම් ගෙඩිය

ශාන්ත රාජපක්ෂ කිවිඳුන්ගේ නිර්මාණයකි.

කළු කම්බිලි 4

කළු කම්බිලි 4

සීපදයක් සමග කටගොන්නක් බීලා
සයිමා දොරට ගැහුවා දඩ් බිඩි ගාලා
දාහෙට ගගට බැස්සත් බාගෙට නාලා
දෙන්නා නැගිට්ටා සළු පිලි පටලාලා

බිසොවට මිසක් මෙහි පාඩුව ඔහුට නෙමේ
පෙම්වතියක් සිටී අරුණ ට එහා ගමේ
වැඩිවැඩ නැතත් සිනමාහල් අඳුරු ඉමේ
රහසේ තොලගාති දෙදෙනා රසය පෙමේ

යහමින් මුදල් එන හන්දා මිස අතට
ආසම නෑ රුවනි නම් මේ කපුකමට
ආඩාපාලි කිව්වා ඈ සරදමට
අරුණගෙ ළඟින් හමනා දුම්මල ගඳට

ලද ඉස්බක දෙවොලෙ තිරයට මුවා වෙලා
උරලා ගන්න මදිරාවට දෙතොල් තලා
රුවනිට වඩා අරුණගෙ සිත පියා සලා
බිසොවගෙ පිරුණු නා දල්ලට ඇළුම් කළා

මේ තහනම් පෙමේ අළු යට ගිනි පුපුරු
පැතිරුණි ගමපුරා දෑසින් දුටු අයුරු
ගැමි ගතියකි සොයන එක අනුනගෙ කෙහුරු
සඟවනු කොහෙත් බෑ වක්කඩ වල හකුරු

පෙම් හබ සමග කේලම් හා සිනා සිසී
ගැම් හිරු උදේ නැග හවහට ගිලා බසී
ජන දිවි ගෙවෙයි තම රැකියා පරිදි රිසී
කඩ පිල රා පොලත් නිදි කිසිවක් නොඇසී

උදයේ කඩිගුලක් වාගේ හෝ ගාලා
ගැමියෝ දුවති දේවාලේ පහු කරලා
ඇසුවා බිසෝ "ඇයි" එකියක නවතාලා
"ජින්නා වත්තෙ පොල් ගහකින් පතබාලා"
.............................................................ශාරා
එරෙහිව ආ එකා මක බෑ උනාද ?
දෙවියෝ කෝප වී මොනවත් කළාද?
පොල් ගහකින් වැටී ජින්නා මළාද ?
එන ශනිදා බලමු මොනවා වෙලාද?

ශාන්ත රාජපක්ෂ කිවිඳුන්ගේ නිර්මාණයකි.