ඇරඹුම සහ නිමාව...!!

ඇරඹුම සහ නිමාව

රස තන හස ගන මිහිදුම් සළු පොටකින් මෘදුව  වසා
මිහි සුරඟන සුව සිහිනෙක තුරු වැලකින් පාර  අසා
ඇගෙ අත ගෙන මධු සමයට රිවි කුමරුන් වඩින          නිසා
තුණු සියොළඟ කිති කැවෙමින් හිමි පිදුමට බලයි  දසා

පෙරඹර නැගි පැහැදුල් සස කිරණ ඇගේ නළලෙ  වැදී
හද බිඳ හල දුකඳුර යයි බියවී වෙනතකට  ඇදී
බල සුරගඟ හිනැහෙන හැටි කිඳුරඟනට කැළුම්    දිදී
සිඹ නිලුපුල සහ රතදර ඇගෙ නෙතඳර කඳුළු   බිඳී

සෙනෙහස් ගඟ මුකුළු පෙනේ පුන් පයොදර මැදින්     නෙළූ
රන් රැස් වැද ප්‍රිය කුමරුගෙ මින් රළ තව තවත්  ගැලූ
හිමි සඳ වැද ඇගෙ උයනට යුග හස නල ලෙසින්         පෙළූ
නෙක පියුමන් මත මුවරද  මවා සුවඳ පාට  බැලූ

ගෙල සුරතද නැබ සියොළඟ  රන් රැස් දහරින්ම  තවා
සිඹ වුවනත ළඳ පොබකර දිවි රස කර  දවස  මවා
ඔහු අවපස වෙත ළංවන විට ඇගෙ මුලු හදම  දවා
සිඳු ගඟ තම කුස තුළ රවි සඟවයි පැහැසරය  නිවා

නයෝමි සිරිනාලි නවරත්න කිවිඳියගේ නිර්මාණයකි.

සමාධි පිළිමය අභියසදී බුදුහිමිට කී කේලම..!!

~~ සමාධි පිළිමය අභියසදී
බුදුහිමිට කී කේලම ~~

දුර මග ගෙවා ගෑටුවෙ තෙල් මල්...........ඇන්න
සිව් බඹ විහරණය වෑහෙනු දැක..............ගන්න
ඉර - කය දවන මුදු පුළුවනි ඉව..............සන්න
අවසර ! හිමියනේ පායුග නම................දින්න

සමිඳුනි, තුන් වරක් ඇවිදින් අතී...............තෙහී
සිරිලක පුරා හෙලුවට ප්රඥාවෙ................වැහී
බොදුනුවො කියාගෙන වැන්දත් කවුරු.....කොහී
බෙහෙතට එකෙක් නෑ ! ධර්මය සමඟ.......මෙහී

වසරට වාරයක් සමනොළ කන්ද...............නැග
දෙදණින් වැටෙති බුදු සිරිපා මළුව...............අග
බැති බරටමද මන්දා ! බොදුනුවන්...……....ළඟ
පස් වෙනි සීලෙ බිඳලති යන අතර…………මග

සත වෙත මහා කරුණාවෙන් දුන්නු….….බෙදා
සිරි මුඛ ද්වාරෙන් ඔබ දෙසු දහම..............එදා
චීවර දරණ උතුමන් පරසිද්ද....................සදා
දෙසුමට වඩින්නෙත් මිල මුදලටය……....මෙදා

සුදු පිරුවටෙන් සැරසී හැම පෝය………....කට
පුද පූජාද, පිළිවෙත් වුව ඇත....................එමට
මෙත් භාවනාවත් කියවති පුරුද්..................දට
ගෝනුස්සෝය එනමුත් පපු කුහර……….....යට

හැම දේකදිම දන පින ඉදිරියට..............හොවා
පිරිතක් කියයි ගෙදරදි බුදු පුතුන්...............ලවා
ලැජ්ජයි හිමියනේ ඉතිරිය කීම..................පවා
සඟ ඝන පිටවු සැන ඇත මත් වතුර............එවා

දනිමිය පොදුවෙ පර පන වැනසීම...........පවක්
දුන්නෙද ? හිමියනේ ගවයට වෙනම….තැනක්
මල බෙර ගහති දුටුවිට ගව ඝාත............නයක්
සිය ජීවිතෙත් පිදුවා එක සංඝ................නමක්

තවකෙකු කරන පව දැක වෛරෙන්…..…..ඊට
හැසිරෙන එකද අකුසලයක් වූ..................වාට
ඕවා තේරුණේ හිමියනි කොයි................කාට
උන්ගේ කරුම ගෙනියයි උන් යන…..…....දාට
(ශාවී) ශාන්ත විජේසිංහ කිවිඳුන්ගේ නිර්මාණයකි .

අසන් මෙපුවත...!!

අසන් මෙපුවත ලියම් කවිකර දරාගත හැකි වේද........ කියනු
දනන් සමහර මෙබිම වසනා කරයි අමතක යුදය........ දරුණු
උපන් මව්බිම දෙකඩ කරනට එදිරි රණවිරු පුතෙකි... රුහුණු
මෙවන් විරුවන් විඳින සැප ගැන ඔබ දකින දේ මෙහිම ලියනු

සටන අවසන් විය සිරිලක සැමරුවා නිදහස.............. එදා
පිහිට විය යුතුමයි සෙනේබර විරු පුතුට දිවි තෙක්...... සදා
පාදයක් නැත සෙබල පුතුගේ ගමන බොරු කකුලක් යොදා
ඔහුද ගොඩවුනි බසයකට පෙර කිහිලි කරුවක් ගෙන... බදා

බෙදා වෙන් කර ඇති අසුන් එහි ගසා දැන්වීමක්...... ඇතේ
බිඳී අත පය විරු පුතුන් සහ ගර්භනී මව් වරු.......... වෙතේ
මිනිස් වෙස් ගත් සුනඛයෙකු විය විරුට හිමි අසුනෙහි මීතේ
මුදාගත් රට මුන්ට නිදනට නුඹට හිමි ඇසුනද.........නැතේ

දෙනෙත ඇර මේ අධම මිනිසා නොරිස්සුම් බැල්මක් හෙලා
පුතුගේ අත ඇති කිහිලි කරුවද ඉල්ලුවා ඔහු හද........ තලා
බසින විට ඔබ ගමන අවසන දෙන්නෙමි ඔහු සන්...... කළා
වීරිය ගෙන ගත සිට ගෙනද ඇත රණ බිමද සිහිපත්..වෙලා

සියලු මුඛවල් ගොළු වෙලා ඇත දුටු නමුදු මේ ජඩ වැඩේ
විවර වූවා මගේ කට හඬ කෙලෙස ඉවසමු දන....ගොඩේ
සතුරු බැල්මෙන් නැගිට සිටියා සිරවෙලා සිටි සේ. මඩේ
නිහඬ සිටි අන් දනන් කටවල් අගුලු හැරියා..... වක්කඩේ

මිනිස්කම් අද පලා ගොස් ඇත මුදල් මත එය ඇත.....රැඳී
දහම් අසනා නිරන්තරයෙන් බෝ දනා අකුසලෙ..... බැඳි
ලියන්නට නම් තවත් දේ වෙති යහගුණය නැත හද...සිඳී
කියන් මිතුරනි නුඹ සිතන දේ කොතෙක් ලිව්වත් ඉඩ මදී

ආර්ය ගමගේ කිවිඳුන්ගේ නිර්මාණයකි .