ශෘංගාරය හා විචාරය...

Real Machan සම්පත් කුරුප්පුආරච්චි

23 January 2013

බුදු රජාණන් වහන්සේ අභිමුව පැවත් වූ ඒක පුද්ගල සංගීතප්‍රසංගය, ශෘංගාරය හා විචාරය...

අරා දෙව් බඹ සියක් සේනා පුරා නුඹ ගැබ හැම දෙසේ
දරා වීණා පංචසිකයන් තව්තිසා පුරයෙන් බැසේ
ඉරා පාවෙන වළා තීරය සක් දෙවිඳු ඒ මැද දිසේ
දරා ‍රැස් හිස ඉන්ද්‍රසාලෙහි කුටිය මැද බුදු හිමි වෙසේ

සුරද අසුරද මවිත කරවන වෙන නදක් පුරයට ඇසේ
පරදනා හැම නදම ඒ හඬ හරිමිදෝ දෙසවන් කෙසේ
පුරඹ හා විඳි රසය බුදුහිමි සවන් පිස යයි රිසි ලෙසේ
එරස හිමියන් නිහඬ සවනත මධුර ස්වරයක් සේ වැසේ

පිපුණු නෙළුමක රෝස පාටින් පිරුණු කලවා යුගලට
වැ‍ටුණු දෑසේ නුරා මා සිත නොහැක ගලවා ගැනුමට
සරනු මා පපු තුරා සොඳුරිය හොවා එය මා උකුලට
හලනු රාගික සුවඳ වත්සුණු පිබිදි ආශා සයුරට...

පෙරා සඳ කැන් ගෙනා නොයිඳුල් දෑස දිදුලයි තරු වගේ
සොරා එක ඇස් කොනක් පමණක් බලා යයි මා වත දිගේ
මරා මරු නැති උණත් ආශා හිමියනේ බුදු වූ මගේ
උරා ඒ රස මලක් සේ මම සැතපුණා සිරුරත ඇගේ...

සොඳුරු අරනක කිඳුරු දෙව්දුව සිහිනයකි කළ්‍යාණිය...
මැදුරු නැතුවත් ආදරේ බැඳි රාගයේ ගැසු ධරණිය
ඉහිරුණා හිමියනේ මා සිත නුඹ ළඟත් හිර නොව්නිය
අඳුරු කඩ තිර මතදි හමුවෙන සුන්දරයි ලොව ගැහැනිය..

නදින් නුඹෙ වෙන මගේ හදවත අපමණක් සුවයෙන් පිනා
රසින් නැහැවින මියුරු සත්සර අමාගඟුලක් සේ උණා
ළඟින් තැබුවිට නුඹෙ මියුරු හඬ වෙන නදත් එක්කර මනා
ලෙසින් ගැළපෙයි රනට රන්රස කලතනා සේ මෙහි අනා

බිත්ති තිබුණත් සෙවණ සිදුරුව තෙමී යයි නිවහන් වැසූ
රුවැති සියලුම දේ අනිත්්‍යයි ඔබද මා හැම ඇස ගැසූ
නත්ථි රාගෝ සමෝ අග්ගි පංචසිකහට හිමි දෙසූ
නොවෙති ලොව රාගයට සමවන කිසිදු ගින්නක් අප ඇසූ...

සම්පත් කුරුප්පුආරච්චි කිවිඳුන්ගේ නිර්මාණයකි.