සදාචාර
රව්ම් කරපු ලියුම් යවපු මංගල යෝජනා තීර
මිල රුව වතුපිටි කුල ගොත් නිසා බිඳුණ එකක් නෑර
හදවත රන්මුවා වුණත් වටිනාකම් නොමැති කෲර
සමාජයක තනිකඩයෙකි සරණක් නැති සදාචාර..
දෙවැට අයිනෙ ඇස් දලවා ගස් සෙවනක වැඩුණු මාර
කෑලි කැපෙන පඳුරු ගුලක රැක හිටියා අන්ධකාර
කොමල ලියන් ගිල ගනිද්දි පහළ ඇලේ වතුර පාර
නොලබන නොදකින සිහිනය බලන් හිටියෙ සදාචාර..
බසයක දුම්‍ රිය මුල්ලක රාගික රූ විසේකාර
සාක්කුවේ පරිස්සමට රැක හිටියා පාට කූර
පොදු වැසිකිළියට වැදිලා හිත වද දෙන හැඟුම්දාර
පියයුරු ඇඳ කුණුහරුපෙන් කවි කෙරුවේ සදාචාර..
මුදලට අබිසරු මැදුරක පහස පැතුවෙ කෝඩුකාර
කුදලාගෙන ගුටි බැට කෑ හැසිරීමට අනාචාර
ගාර්මන්ට් වැඩ රෑ නිම වී තනිමග හුරු පුරුදු පාර
සමන්ලතා ගෙදර නාවෙ ඇයිද දන්නෙ සදාචාර...
Real Machan @ සම්පත් කුරුප්පුආරච්චි කිවිඳුන් ගේ නිර්මාණයකි.
No comments:
Post a Comment