කළු කම්බිලි 11
පොල නැති සෑම සතියේ දින උදයේම
සිදුවෙයි සාත්තර මල්ලිගෙ පැමිණීම
ඉන්පසු ලතාගේ ගෙයි නොවරදවාම
ඇරඹෙයි දවල් වෙනතුරු දෙව්ලෝ යාම
පාසැල් නොගොස් ගේ අතුගාමින් සිටින
දියණිය දිනක් අහඹුව මුගෙ ඇස ගැටින
දුටුවොත් කෙනෙක් ආපසු හැරිලා බලන
රූමත් කෙල්ල දුටු මේකා ගල් ගැහින
එදවස හැරී ගිය මුත් මූ පස්සෙන්දා
කෙල්ලව බිලී බා ගන්නට අර ඇන්දා
වෙනදාටත් වඩා අම්මට පෙම් බැන්දා
ගැහුවා සැලසුමක් හරියාවිද මන්දා
දැම්මා හොරෙන් බත් හැලියට වැලි අහුරු
පිච්චී පිළිකන්නෙ විත් මහ රෑ කෙහුරු
ඌගෙන්මයි ඇහුවෙ මින් ගැලවෙන අයුරු
ඒකෙන් ඇතිවුණා පාසානම් පයුරු
හූනියමක්‍ ය කවුරුන් හෝ කරපු කලක්
අක්කේ මේ ගෙදර මළයක් විමානයක්
පිලියම ලෙස ඉහමි මතුරා වතුර ටිකක්
කළ යුතු වේය තුන්‍ යම සෙත් ශාන්තියක්
පැලකි පාන් මිදුලේ ගොක් කොළින් තැනූ
අටකි කොණක වත්තේ වලවල්ද කැනූ
සැවුලෙකි කැපූ කරමළ ලේ බිඳක් ඉනූ
බතෙකි පිසුණු එකටම හත් මාළු ඇනූ
මැදියම දක්වාම සිදුවිය මැතිරීම
ඉන්පසු නූල් අතුරා ඉරි පැන්නීම
අණතුරුවයි කළේ ගෙයි දුම් ඇල්ලීම
නිද්‍රාවකට පත්විය ඉන් ඔක්කෝම
ඇතෙක් ගැහැව්වත් මුන් ඇහැරෙනව බොරු
මෙන්න වෙලාවයි දැන් සැලසුමට මරු
මෙතෙක් කලක් රැකි පිරිසිදු පියුම සුරු
බලන් නරුමයෙකු නින්දෙන් බින්ද යුරු
..........................................................ශාරා
ළඳුණේ බලන් දුරදිග කම් සැපට පෙර
කිසිදාකවත් පර ඇසුරක් නොවෙති තිර
යයිදෝ කොහොම දියණිය ජීවිතේ දුර
බුදදා බලමු සිදුවීමක් දුකෙන් බර
ශාන්ත රාජපක්ෂ කිවිඳුන්ගේ නිර්මාණයකි
No comments:
Post a Comment