කළු කම්බිලි 13
රුවනිගෙ පෙම්වතා දැන් ගෙදරට එනවා
දෙපොළෙම කසාදෙට සූදානම් වෙනවා
අපූරුවට මේ ජෝඩුව ගැලපෙනවා
දකින දකින අය නිතරම පවසනවා
දෙන්නා එකටමයි යන්නේ ගමන් බිමන්
දන්නා තැනෙක හැරියා යන අතරෙ ගිමන්
කතා කළේ තුරුළු වෙවී ඉන්න ගමන්
අනාගතේ තනනා හැටි සිහින විමන්
ප්‍රේම කරන්නේ මොටදෝ හොරෙන් හොරෙන්
නෑ තහනමක් දෙන්නාගෙම ගෙදර දොරෙන්
දුවේ නමුත් සමහර දේ අතේ දුරෙන්
තියා ගනින් මව කීවේ හිතාදරෙන්
ලංගම රියැදුරෙකි මොහු දුර සේවාවේ
සමහර විටෙක දින දෙකතුන රැකියාවේ
ඉඳහිට පාළුවට දුම්වැටියක් බීවේ
මත්පැන් උපන්තේකට නෑ කට ගෑවේ
යුධගිනි තදින් ඇවිලෙද්දී උතුරු කරේ
අවධානමෙනි බස් රිය ධාවනය කරේ
ක්ලේමෝවකිය සැඟවුණු කොටි එල්ල කරේ
පැනගත් අයගෙ ගෙල කපලයි ඉවර කරේ
මළකඳ තිබුණෙ මෝචරියේ හිස වෙන්ව
හඳුණාගත් රුවනි වැටුණා සිහිසුන්ව
හත් දා එළඹෙද්දි දානෙත් වැඩ ලන්ව
ජීවිත දෙකක් තව තිබුණා අවසන්ව
තැනු මාලිගා සුළඟේ විසිරුණි වියැකි
රුවනිට වෙච්ච දේ අදහනු බැරි සෙයකි
දිවි තොර කළේ ගෙලවට එති සාරියකි
මියයන විටත් ඇය තුන්මස් ගැබිනියකි
...........................................................ශාරා
මේකත් බිසෝ දෙවියන්ගේ වැඩක් කියා
මුළු ගම්දනව්වම පීරා පැතිර ගියා
ඉන්පසු මිනිස්සුන් ආවේ බිසොව සොයා
වැඳගෙන නොවේ දෝතම හිස මුදුණෙ තියා
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment