කාන්තා දිනය..!!
ජාත්‍යන්තර ලඳ වෙනුවෙන් වෙන් කෙරෙනා අද දින
ආඩම්බරයෙන් සමරමි ගෙයි සමගිය රැක ගෙන
පෑමෙන් සෙනෙහස වැඩිපුර තුටු කරවා ඇගෙ මන
රෑනම් යන්නට සිතුවෙමි භෝජනයට පිට තැන
මතකෙත් අද නැත පියඹට පෙර මෙන් වැඩ බෝසේ
පැතුමන් ගෙන මුළුතැන් ගෙට ආවෙමි සන්තෝසේ
"සමයන්"යන මුදු වදනින් සමගින් උපහාසේ
හසරැල් මුවඟින් නැගුනා ඇසුවම පරකාසේ
මම නම් ඇය ගැනම සිතා දවසෙ අඩක් ගන්නෙමි
දහවල් පැය දොළහම ගෙන ඉතිරි කොටස දුන්නෙමි
සමතැන් ලද පියඹට මා හැකි ලෙස සලකන්නෙමි
මුළුතැන් ගෙය මට බාරයි අද විවේක ගන්වමි
"මගෙ වැඩටික කරගන්නම් ඔහේ ඉන්නව ගෙට වෙලා"
එක දවසක් අපිට මොටද ගනු ඒකත් තමුසෙලා
තුන්සිය හැටපස් දවසෙම ගත දහ දියබිඳු හලා
වෙන් කරනවා මුළු වසරම මට කල ගුණ සලකලා
අහගත්තා පාන්දරම ඇගෙ හරබර දේශනේ
විලිලජ්ජාවේ බැරුවා පොඩිවුන් හිනැහෙනු දැනේ
දැනගත්තා තව බොහොදේ මෙහි ලියන්න බෑ අනේ
සමරන්නේ කොහොමද මිත පුළුන් ගහල මගෙ කනේ
ආර්ය ගමගේ කිවිඳුන්ගේ නිර්මාණයකි
08/03/2016
No comments:
Post a Comment