කළු කම්බිලි 2
දැන් පරසිදුයි බිසො අක්කගෙ දේවාලේ
සෙනගින් පිරී ඉතිරෙයි රෑ දාවාලේ
තරවෙයි මඩිය හොඳවීගෙන එයි කාලේ
බිහිවෙයි ඉරිසියාකාරයො ගම් දෑලේ
සයිමා ඇයගෙ වාහේ අළුයම පිබිදී
කසියා ගසයි නිතරම තිප්පොලට වැදී
වීගෙන සූර් විටෙකදි උස්සාන රෙදී
අමු කුණුහරුප වැනි වැනි ගමපුරා විදී
එක කුස උපන් ඇගෙ අයියා වූ ජින්නා
වත්තේ කොණේ උගේ ගේ අටවං උන්නා
ගස්ගෙඩි කැඩීමෙන් පවුලම රැක ගන්නා
දියුණුව නගාගේ ඇස්වල කටු ඇන්නා
ගෑණී ලතා උගෙ මේ සේරටම හපන්
වලියට එයි බ්සෝ හා ඇඳුමින්ම උපන්
ඇරඹෙයි පදෙන් අම්මගෙ, භාෂාව ජපන්
නරඹයි දනෝ නාටකයම අවට තැපන්
කවදත් ප්‍රගුණ කළ බැරිතැන ඉවසන්ට
ඇය ගියෙ නෑ ලතා එක්කල ඇවිලෙන්ට
හැකිමුත් අඹරන්ට වැඩ දෙපිටිං යන්ට
කිව්වේ නෑ බිසෝ මේ ගැන දෙවියන්ට
ආතුරයෙකුට දාකදි රෑ දෙහි කපන
තඩි ගල් දෙකක් දෙවොලේ වහලෙට වැටින
ව්මසා සැවොම විටදී එළියට පනින
දුටුවා ලතා මිනිහා හා පැන දුවන
සුන්විය ඉවසීම මතුවිය දෙනෙතෙ රත
වියැලී ගියා මෙතුවක් තිබු පපුවෙ තෙත
ආරූඩව බිසෝ ගසමින් උගුර ගොත
වැටුණා සිහිසුන්ව මල් ආසනේ මත
..................................................ශාරා
කෝපය ඉතිරුණා සොහොයුරු කම පරදා
ජීවිතෙ ගත්තදෝ මන්දා උන් වරදා
ශාපය වදින්නේ ග්‍රහයෝ හැර ගියදා
වෙනදේ බලාගමු අපි ඊළඟ ශනිදා
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment