කළු කම්බිලි 1
සුවහස් ගැම් දනන් දහසක් ගැටළු ඇති
සමහන් කරගන්න ඇයගේ පිහිට පැති
ගත්තත් සොච්චමක පඩුරක් බුලතෙ එති
දෙවියොත් සමග ගනුදෙනු නම් ලේසි නැති
හරකා නෑලු වත්තේ සිටි කකා උලා
සැමියා පහරදෙයි බීගෙන තලා පෙලා
හොයනා දේ බලා ඉද්දී බසී ගිලා
දෝණී පැදුරටත් නොකියා ගියා පලා
සතියේ බදාදා හා සෙනසුරාදට
මේවැනි ගැටළු එයි දෙවොලට උදේ සිට
නංගී ගත්තාලු මිනිහා වශීකොට
එකියක හැපෙයි වගුරවමින් කඳුළු කැට
දනතෙක් උණාහල වරලස ලෙලවම්නේ
රතු හැට්ටයට සුදු රෙද්දක් ගලපමිනේ
සුරතේ ත්‍රිසූලෙද ඉඟ සුඟ නටවමිනේ
සාත්තර බිසෝ දෙවොලට ඇදෙනු පෙනේ
වැඳගෙන සැවොම පොරකයි කුටියෙන් එළියේ
නැටුමද තිවුර වෙයි ඇයගේ හිටි හැටියේ
දුම්මල ගඳ දැනෙයි නැහැයට දෙව් කුටියේ
දෙවියන් මේ දැනුයි මල් යහනට වැඩියේ
පුරවා තෙලින් දල්වා පොල්තෙල් පාන
අල්වා සුවඳ දුම් සකසා මල් යාන
ඇගෙ ගෝලයා අත සීනුව හඬවාන
ආ පිළිවෙලට කැඳවයි ආතුර රෑන
හතලිස් වියැති මුත් බිසෝගෙ රූ සපුව
මනබන්දනය පුපුරයි පිරිපුන් පපුව
නා දළු දිලෙයි විටකින් සාරෙට හැපුව
මැණිකක් සදිසිමය රතු කැටයෙන් කැපුව
.......................................................ශාරා
කළු කම්බ්ලි වතිනි මේ කලකට පස්සේ
ශාරා නැවත කවියට කලඑලි බැස්සේ
හමුවෙමු යළිත් ඊළඟ පබැඳුම ඔස්සේ
රස රස දේ තිබේ බ්සො වගෙ පිටිපස්සේ
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment