-අනියතයෙන් බිදක්-
තට්ටය වසා දුටු විට වියු මකුළු දැලක්
සිකි පිල සරිව දිලි වරලස වුණා මතක්
ශ්වේතය දිනා කලු පාටට නොදී ඉඩක්
මවනා වෙනස ගැන නම් සිත සැලෙන හැඩක්
කෙදිරූ රහස් ඇසු දෙසවන වුණේ කුමක්
පිටු පස වැයෙන බෙර හඬටත් නොවේ වගක්
බැන බැන ලඟම හුන් අයටත් සුහඳ වතක්
නෑසුණු කනත් එක අතකින් පුදුම සැපක්
මිණි නිල් සරිව දිලි දෙනයන වගේ ළිදක්
ගල ගල කබ කඳුළු පෙන්වන අඳුරු ලොවක්
කළු සුදු නේක වෛවාරණ දුටුව නෙතක්
මග තොට සොයා ගන්නත් අද විඳින දුකක්
දසන් එදා මුව තුල බැඳි මුතු දෙපොටක්
වසන් වුණා නොදැනිම වී දිරූ වැටක්
සැලෙන රිදෙන කලු වුන දත් ඇතත් ටිකක්
කෑම පවා යුද්ධෙකි නැතුවාට හැඩක්
මිහිර මැවූ වීණාවක් වගේ හඬක්
සවන් පිනූ එදවස එය වගේ විතක්
දිව පටලැවී එන ලොල ලොල ගීය මිසක්
කවද ගයන්නද නැත යළි එවන් හෙටක්
පුර සඳ සේම දිදුළන විට සුසුදු වතක්
රන් රුව පවා පරයන අති සොඳුරු රුවක්
ඇකිලී ඉරි වැටී වැහැරී ගියපු සෙයක්
පඹයෙක් සිහි වුණා වැනෙනා මැදදි කෙතක්
තරංගා ජීවනී කිවිඳිය 2013 මැයි මස 25 වන දින මුහුණුපොතට එකතු කළ නිර්මාණයකි .
No comments:
Post a Comment