ෆුල් ඔප්ෂන්

ෆුල් ඔප්ෂන්

මව් පියො දෙදෙනාම මියගිය කුඩා කල
දරුවෙකි වැඩුණු තම මාමගෙ සෙවන තුළ
කරඳඩු මහත් වී අවසන උසස් පෙළ
රැකියාවකට ගියෙ බෝඩිම කදුරුවෙල

රිසිසේ බුක්ති විඳ නිදහස ලැබුණ මෙසේ
රැකියාවද කරයි තනිකඩ නමුදු කෙසේ
ටික ටික නැගෙන විට හිත යට තරුණ විසේ
කෙල්ලක සොයාගති ඉරුමට ප්‍රේම රසේ

ටික දිනකට පසුව දෙදෙනා දැන හැඳින
යුග දිවියටම යන්නට කටයුතු යෙදින
යුතුකම පරිදි මාමා හමුවී මෙදින
ගන්නට අනුමැතිය ගමරට යයි දෙදෙන

දුටු මනතින්ම මාමා ඇස් උඩ හිඳුවා
කෙල්ලගෙ හිසේ සිට පාදා තෙක් බැලුවා
සන්කර අතින් කැඳවා පසෙකට කොලුවා
රහසින් නමුත් කෝපෙන් මේ ලෙස ඇසුවා

කොයි ලෝකෙන්ද මේ දරහැව ගත්තෙ හොයා
දත් ඇඳි කෙහෙල් ඇවරිය වැනි පිටට අයා
වපරය මෙනිය දකුණැස බොම්බායෙ තියා
බලපිය ගොනෝ වමැ,සින් කල්කටා ගියා

බෙරි තොල යටින් තැන තැන රැවුලත් ඇදිලා
බොල කිරි ගොටුත් පපුවේ හමටම ඇලිලා
කියපිය ගොනෝ තොට ඔල්මාදෙද කියලා
මේ වගේ එකක් බැඳගන්නට අමු කැවිලා

ඉවසා බැරිම තැන කොළුවා මෙසේ කියයි
මා කොහොමටත් ෆුල් ඔප්ෂන් වලට බරයි
මාමා මෙතන හොර රහසේ කතා කරයි
"පියසීලිගේ කන් දෙක ඇහෙනවත් හොරයි"
-------------------------------------ශාරා

ශාන්ත රාජපක්ෂ කිවිඳුන්ගේ කවි පන්තියකි. ඔහුගේ  අවසරය මත උපුටා පලකරන ලද්දකි.