තරුණයින් නිතර හමුවී සතුටු වන අසල් වැසි ගෙදරට ගොස්
ජීවිතයේ සැඳෑවිය ගෙවනා බීමත් අයෙකු කියනා කතාවකි.
--- බේබද්දෙකුගේ කතාව ---
සතුටුවන හැටි පේනවා නිති ඉන්න බෑ තව .............. බලාන
උතුරවන සෙනෙහසක් තියෙනව හංග ඉන්නේ ......... දරාන
මිලින වනමුත් වරක් හිනැහී පිපි මල් පෙති .............. හලාන
මහලුවන මට හැරමිටිය කෝ කවුද දෙන්නේ ....... සොයාන
දරුවනේ එක් වතාවක් අහගෙන ඉඳන් මේ .............. කතාව
කිව්ව දේවල් ඇහුව පසු සම කරනු හැකිනම් ............ සතාව
අද වගේ මතකයි නිතර ළඟ උන්නු පෙම්බර .............ලතාව
මට මගේ නැති වුණා දරුවනි ඇයත් එක්කම .............පුතාව
හෙටයි අපි දෙන්නගේ ලෝකෙට එන්නෙ පැතු ඒ ..... පුතාම
හැඩයි මං වගෙ තියන්නෝනය නමක් ලස්සන .......... ඔයාම
කියයි දොස්තර පාන්දර දෙන්නාව බලනට ............... ගියාම
පුතයි නෝනයි ගියා මේ දැන් ඔයා තනිකර ............... දමාම
හිටියනම් විසි හය වසක් යස ඉලන්දාරිය ................... පියාට
නුඹල වුව එහෙනම් මගේ ගෙදරටත් එයි හැම ............ හවාට
ඇසෙනවා බෙර ගසා තාලෙට කියන සිංදුව ............. මෙහාට
ඉවස ගනු බෑ මටත් නොදැනිම කඳුළු වැටෙනව ....... හොරාට
ඔන්න ඔය කාරනේ හින්දයි හුරු වුනේ ඔය ............... ජරාව
යන්න ගිය දා ඉඳන් තව නෑ හිතට දැනුණේ .............. නුරාව
උන්න නම් දන්නවා හුරතල් කරයි මම මුණු .............. පුරාව
ඉන්න බෑ මට නවත්තන්නේ මරන මොහොතෙයි ....... සුරාව
--- ශෂික මධුරංග කරුණාරත්න ---
ශෂික මධුරංග කරුණාරත්න කිවිඳුන්ගේ නිර්මාණයකි. ඔහුගේ අවසරය මත උපුටා පල කරමි. මෙයින් උපුටා ගැනීමක් සිදුකරන්නේ නම් නිර්මාණකරුගේ නම සටහන් කරන්නට කාරුණික වන්න.
No comments:
Post a Comment