" ගඳ සුවඳ "( පළමු වෙළුම )
සේකර තරුණයෙකි ගතිගුණ පිරුණු හොඳ
සේවය කළේ කුණු ලොරියෙයි ගහන ගඳ
ගේදොර මුඩුක්කුව තුළ විය නගරෙ මැද
තාමත් මල්සරා නැත හදවතට විද
පොහොසත් දනන් විසුවත් මල් මෙන් මුදුව
දුප්පත් අයට දයිවය සලකයි රුදුව
ඉරණම මෙය නමුත් ලොව දෙපසට බෙදුව
මුන්ගෙනි රැකෙන්නේ නගරයෙ පිරිසිදුව
මව සේකරගෙ නිතරම මැසිවිලිම නගයි
උඹෙ යාළුවෝ අද දරු සුරතල්ද බලයි
බැඳපන් පුතේ මම දැන් මියැදෙන්ඩ ළඟයි
රස්සාවට මගේ කැමතිද? ගැහැණු ළමයි
අවසානයේ මිතුරෙකු පන මෙන් ළබැඳී
සෙව්වා ළඳක් ඔහු හට ගැළැපෙන පරිදී
රස්සා වනම් සඟවා කියමුකො මුළදී
කතිකා කළේ කපුවෙකි තඹ කරන රිදී
මනමාලිය ළඳකි ගැමි බණ්ඩාරවෙල
අගනා රුවැත්තියකිය කළ නොහැකි මිල
ඉගෙනාගෙන තිබේ දක්වා උසස් පෙළ
කපුවා කීය බැන්දොත් පෙර පිනකි බල
මනමාලයෙකි ලිපිකරු සේවයෙ නියුතු
සඟවා කීය රැකියාවෙහි නියම තතු
කපුවා නියම කරගති දින බැලිය යුතු
ආවා නෑදැයො සහ මව සමග පුතු
සාදරයෙන්ම පිළිගත්තා සියළු දෙනා
තේ මේසයක් තිබුණා ජය පහට තනා
ආවා මනාලිය රුව දෙවඟනක් මෙනා
මාමණ්ඩිය වැනී ලිපිකරු බෑණ ගැනා
ඊළඟ විරාමය දෙපළගෙ කැමැත්තට
සේකර නැගී සිටියා සුළු මොහොතකට
කීමට තිබෙන බව පවසා යමක් මට
මාමණ්ඩියව කැඳවා ගති අයිනකට
..................................................ශාරා
පළමුව සරසවිය දෙවනුව ඔබ හැමද
කලකිනි දුටුවෙ අවසර ගමි පා නමැද
ඉතිරිය ලියන්නට ඉස්සර ගඳ සුවඳ
කොහොමද දැනුනෙ කියලා මට කියනවද ?
ශාන්ත රාජපක්ෂ කිවිඳුන් ගේ නිර්මාණයකි.
No comments:
Post a Comment