" ගඳ සුවඳ " ( දෙවන වෙළුම )
ඔබ පවසනා තුරු නම් දැන නොසිටියෙමි
වරදක් වෙලා ඇත ඒ බව දැන් දනිමි
නැග කුණු ලොරියෙ නගරය පිරිසිදු කරමි
කම්කරුවෙකිය මම ලිපිකරුවෙකු නොවෙමි
සිදුවුණු වැරැද්දට ඔබගෙන් යදිමි සමා
පුතෙකුගෙ කරුණකදි අම්මල ඔහොම තමා
ඔහුගේ දෙපා සිඹ කඳුළින් දෙනෙත තෙමා
යන්නට හැරුණි සේකර හිස බිමට යොමා
නවතිනු එනු මැනවි මා වෙත බය නැතුව
විරලම උතුම් ගුණයක් ඇත ඔබ සතුව
දියණිට ගැළපෙන්නෙ ඔබමය මා පැතුව
මේ ඔවදන් අසනු හොඳ සිහියෙන් යුතුව
මම අනුමැතිය දෙමි මගුළට සැරසෙන්න
දියණිය තවම බොළඳය මෙය අහගන්න
පමණක් රැකියාව ඇයගෙන් සඟවන්න
දැනගන්නා තුරුම කාලෙට ඉඩදෙන්න
ජය මගුළින් පිරුණි මුළු බණ්ඩාරවෙල
දෙයතක් අතින් දැල්විණි දිවි පහන් සිල
මනුසත් කමට යට විය නිළ බලය කුළ
ඉරණම එයයි මහබඹු කෙටු නළල තුළ
නිල්මිණි සේකරගෙ මගුළත් සිද්ධ වුනා
හැමදෙය සිරිතටම විරිතට ඉවර වුනා
සමුගෙන යන මොහොත කඳුළින් බරම වුනා
සේකර පියඹ හා ගම වෙත පිටත් වුනා
යෙදිලා වෙහෙසකර ගමනක උදේ හිට
මරදානට එද්දි හිරු දින නිමාකොට
ගිලෙනා මොහොතෙ දැනුනේ ඇට හැබෑවට
වැටුණා මෙනිය දෙව්ලොව සිට අපායට
.......................................................ශාරා
මුඩුක්කුවේ ඇති ගඳ සහ අපිළිවෙල
ඇයගේ කැකෑරිය නැහැයද මොළය මුළ
දෙදෙනා නෙළන හැටි තම මධුසමයෙ පල
ඉවසීමෙන් බලමු ඊළඟ කොටස තුළ
ශාන්ත රාජපක්ෂ කිවිඳුන්ගේ නිර්මාණයකි .
No comments:
Post a Comment