ගඳ සුවඳ " ( තෙවන වෙළුම)
නැහැයම කකාරයි කුණු කාණුවේ ගඳ
සිරුරම දවයි කර්කශ ගිනි පවන මද
විලිබිය නොදත් ගැහැණුන්ගේ හරුප නද
මැද ගෙට වැදුණි නිල්මිණි මෙය දරා හද
කාමර නොමැති සාලයෙ රෙදි කඩක් යොදා
සාදා තිබුණි කුටියක් හරි මැදින් බෙදා
සේකරගේ දෑත නිල්මිණි තදින් බදා
පිය මැන්නාය මංගල රෑ ගන්න නිදා
සාදය තවම යයි වත්තේ පිරිසතර
ගෑණුද පිරිමි මත්විය පදමින් බඹර
ජෝතිගෙ බෙග්ගෙ ගී යද්දී පවනතර
කෝකිල එම් එස් ද ආවා මේ අතර
උස්සා නැටුව නැටුමට තම රෙදි යාරේ
දිස්වී හැමට පේමක්කගෙ ග්‍රහචාරේ
දැකලා ඒක විසිවී නන්නත්තාරේ
සයිමා බදාගති කණුවක් මහපාරේ
යන්තම් නිමාවිය අළුයම් ජාමෙ නැටුම්
අගුපිල්වල තිබුණි සමහරු ඇඳපු ඇඳුම්
මත්පැන් වලට මුසුවූ විට රාග හැඟුම්
එළිපිට නැටුණි අනියම් පෙම් අනග රැඟුම්
මර ඝෝෂාව හෙමිහිට නිමවන අතරේ
හිමිදිරි සුළඟ දස දිග අවටින් පැතිරේ
තුන නද දෙද්දි නගරයෙ හෝරා යතුරේ
ජෝඩුව ඇලවුණා මධුසමයට පැදුරේ
ඉවසුම් නොමැති අශාවට ඉඩදීලා
මධුසම රැඟුම ඇරඹුණි දඩිබිඩි ගාලා
නිදියාගනිල්ලා රෙදිපිළි පොරවාලා
මොකටද ? කුකුල් කූඩුවකට ඇහැ දාලා
...........................................................ශාරා
වටපිට පෙනුම මුත් අභිමතයට නුහුරු
පැද යා යුතුය යුග දිවි මග බැඳි පහුරු
සඟවා බිරිඳගෙන් රැකියාවෙහි අනුරු
හතරෙන් බලමු සේකර හැසිරෙන අයුරු
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment