"ගඳ සුවඳ " ( සිව්වන වෙළුම )
සතියක නිවාඩුව දිනයෙදි ඉවර වෙනා
සේකර ඔන්න රැකියාවට පිටත් වුනා
ගෙදරින් බැස්සාට ලිපිකාරයෙකු මෙනා
ලොරියට නැග්ගෙ බැඳි ටයි පටි ගලවමිනා
හිතකින් නොවේ ඔහු බිරිඳට බොරු කෙරුවේ
මාමණ්ඩියගෙ උපදෙසටයි හිස නැමුවේ
කාලය අනුව හැමදෙය හරියට සිදුවේ
කිව්වත් තද දුකිනි සේකර කල් ගෙව්වේ
තුන් මාසයක් හරි වේගෙන් ඉගිල්ලුණි
සේකර වැඩට වෙනදා මෙන් පිටත් වුනි
ඔක්කාරය සමග අපහසු ගතියකිනි
නිල්මිණි ගෙදර පිටුපස්සේ කරකැවිනි
පැනයකි ගෙනාවේ සැමටම සිදුවීම
ඇය ගෙනගියා වෙදැදුරු වෙත උදයේම
ඔහු තතු බලා නැන්දම්මට කී මේම
මිත්තනියක වේය ඔබනම් නුදුරේම
සතුටින් ඉපිළ සිම්බා ඇය තම ලේලී
නෙතඟින් විසිරුණා උණුසුම් දිය පේලී
මුවගින් මිමිණීය මේ අසරණ මෑලී
දෙවියෝ රකින් මගෙ කොල්ලගෙ මනමාලී
මව්මින් සිහින පොඩි පුතෙකුගෙ කිරි සුවඳේ
එන ගමනෙමයි ගංගාරාමය වැන්දේ
ගෙදරට ගිහින් සේකර අමතමු නැන්දේ
කියමිනි බෝ මළුව වැඳ පඬුරක් බැන්දේ
ආපසු එනවිටදි බස්නැවතුම හරියේ
සේකර එල්ලිලා පසුපස කුණු ලොරියේ
දැක යන අයුරු නිල්මිණි පිටකර හැරියේ
ගිනි ගුලියකිය ඉක්බිති ඇරඹෙන වලියේ
............................................................ශාරා
හැම සතුටක්ම දිගු කලකට උරුම නැත
සිනහව කියයි කඳුළැල්ලක රසය නෙත
ඇස නොරැවටෙයි කිසිදා රැවටුවත් සිත
ගිනිකෙළි ගොඩක් එන පස්වන වෙළුමෙ ඇත
No comments:
Post a Comment