ගඳ සුවඳ " (සත්වන වෙළුම )
මහල් නිවෙස තුළ නම් නැත ගඳ වත්තේ
පිරිසිදු කම තමයි මහ ඉහළින් ඇත්තේ
ඒකම නිසයි නිල්මිණි ගේ හිත ගත්තේ
ගේදොර බඩු පමණි පිළිවෙළකට නැත්තේ
නිදියාගන්න ඇඳවල් නැත පැදුරකිය
ටී වී එකක් නැති සාලය කතරකිය
නොමැතිය ශීතකරණය මහ අඩුවකිය
කුස්සියෙ භූමිතෙල් පුරවන උදුණකිය
රැකියාවෙන් පසුව දුවගෙන එන්නෙ හුදෙක්
තම දරුවා සමග සුරතල් වෙන්න ටිකක්
පළමුව හොඳින් නාගෙන පිරිසිදුව මිසක්
නිල්මිණි ගෙන් ඔහුට නොලැබුණි ඊට ඉඩක්
දරුවා වඩාගෙන් සිඹ සිඹ සුවඳ සොයා
තියලා බිම වටේ නට නට ගීත කියා
කොල්ලා හිනා වෙනවිට පොඩි මුවග අයා
අත්පුඩි ගැසුවේය බිළිඳෙකු වගේ පියා
දවසක් උදේ සේකර ගියපසු වැඩට
දරුවට කිරි පොවද්දී තදවී ළැමට
ගැස්සී ගොසින් කිරි ටික ඉස්මොල්ලයට
සිහිසන් නැතිවුණා මේ කිරිකැටි පුතුට
නිල්මිණි කෑ ගැසී හිස අත බදා බියෙන්
අල්ලපු ගෙදර දොර ඇරුණා විලාපයෙන්
දිව ආ තරුණයා ගෙන ඔහුගේම රියෙන්
රෝහල් ගතකළා මව පුතු විනාඩියෙන්
අණතුර වැළකුණා සිදුවීමට තිබුණ
රෝහල පැසසුවා මේ කොළුවට තරුණ
සේකර ගෙදර ආපසු දැනගෙන කරුණ
තුති පුදකළා ඔහු හට බැඳි සෙනෙහසින
රැකියාවක යෙදෙන අගනගරයෙ ඉහල
ඔහු තරුණයෙකි යාපන පුරවර දමිළ
පෙළපත වංශවත් සිටු පවුළක ප්‍රබල
එනමුත් චතුර ලෙස හසුරන බස සිහල
.......................................................ශාරා
මතු සම්බන්ධයි
ශාන්ත රාජපක්ෂ කිවිඳුන්ගේ නිර්මාණයකි.
No comments:
Post a Comment