ගඳ සුවඳ "(දොළොස් වෙළුම )
නිල්මිණි දරුව වැජඹෙති මල් ගොඩක මුදු
සේකර ගෙවයි ජීවිතයක් කටුක රුදු
යන්තම් කවයි බත් දෙකටක් අතින් හැදු
අම්මෙකුගෙනම් සෙනෙහස අඩු නොවේ වැදු
සති අන්තයේ එක්කෝ චිත්තර පටියක්
නැතිනම් කොහේ හෝ ප්රියසම්භාෂණයක්
නිල්මිණි ගෙවද්දී සුන්දර ජීවිතයක්
සේකර රෑට බොයි තනියම තුන්කාලක්
වත්තේ හොඳ එකා බේබද්දෙකුත් වෙලා
ඉවසා ඉනු බැරුව සේකර දුකින් බලා
දෙනෙතේ ගැලූ උණු කඳුළැලි ඉවර වෙලා
පපුවේ අමාරුව හැදිලා මවත් මළා
කිසිවෙකු නොමැති ලොව සේකර තනිවීය
මත්පැන් වලට තව තව සිත ලොල් වීය
සිරුරද කෙසඟ විය පැහැයද අඩුවීය
ඔහු ඇත්තටම ඇවිදින මිණියක් වීය
මිතුරෙකු සේකරගෙ දැකලා මේදෙන්නා
ලිපිනෙද ලියාගෙන විත් අතටම දුන්නා
දින කීපයක් නෑ සැරුවත් සොයමින්නා
යළි එන අදහසින් ඔහු ආපසු එන්නා
ඉරිදා දිනෙක නිල්මිණි හා පුතු රැගෙන
අර්ජුන ගියා කෑමට වෙනසක් ලෙසින
ඔහුගේ පියා යාපනයේ සිට එදින
කටයුත්ත්කට සිටියා කොළඹට පැමිණ
ආ කටයුත්ත නිමවාගෙන සවස් කලේ
ඔහු ආහාර ගත්තෙත් එම අවන්හලේ
පුතු අත දමා දරුවෙකු ඇති ළඳක ගෙලේ
යනු දුටු හදිසි දසුණයි හිත සසල කළේ
විපරම් කර පියා ආපසු යන්න ගියා
පසුදින ආය පණිවිඩයක් පුතුව සොයා
මෙය ලද වහා එනු අර්ජුන ගෙදර කියා
එහි තිබුණාය අණදෙන අයුරකින් ලියා
...................................................ශාරා
මතු සම්බන්ධයි
ශාන්ත රාජපක්ෂ කිවිඳුන්ගේ නිර්මාණයකි.
