==============සුදු මැණිකේ ====================
දෙදහස් දහ හතරේ අද හත්වෙනි මස අට...............වෙනිදා
තෙරුවන් සරණයි ! ලියමන ලියන්නෙ මුළු රැය......නොනිදා
මගෙ ආදර සුදු මැණිකේ මගෙන් මිදී ගම................හැරදා
තුන් මසකට වැඩියි නේද වෙනකොට මේ එන...........ඉරිදා
පිළිවෙලකට ගොනු කරගනු බැරි සිතිවිළි හිත...........අඩංගු
එකලස් කර ගන්නට මම කාලය කෙරුවෙමි............මිඩංගු
කුඹුර කෙරුව මහන්සියට හුරු අත වැටිලා...............විලංගු
ඒ හින්දයි ලියමනකින් අමතන්නට වුනෙ................සුනංගු
වැව පාරෙහි ඉස්මත්තෙදි බස් එක දැක ඔබ.............එක්ක
මා අතහැර ගොඩවුණු දා මතකයි හීනය..................දැක්ක
තනිකඩ මගෙ ගෙපැල මැදක පැදුර එලා ගෙන.......දොක්ක
තවමත් ඒ සොඳුරු පැතුම් සසලයි තනියම................රැක්ක
නිවාඩුවට ඔයා එද්දී වැඩක හිටියෙ පහල................වෙලේ
පණිවිඩයක් ගෙනා මුවඟ සරදමකුත් තිබුණි...........තොලේ
මා දුටු විට හරවාගෙන කවුරුත් නැති දෙමන්.............සලේ
කලිසම් ඇඳි එයා කව්ද ගෙනත් ඇරපු බයිසි..............කලේ
ඔරවාගෙන මගේ දිහා මහන්සියට බැලුව..............සැරෙන්
ගලවගත්තෙ අමාරුවෙන් තිබුණු මල්ල ඔබගෙ.......කරෙන්
ඇඳන් ගියපු මල් ගවුමට නිමා තියල ඇඟට............හිරෙන්
කොටට ඇඳපු අමුතු ඇඳුම දිහා මමත් බැලීමි ......හොරෙන්
රැළි බේරුණු ,මල් අමුනපු ,කොන්ඩ කරළ තිබුණු.....පිටේ
තිබුනේ නැත එය දුටුවේ පසුකර යන හැටට............හැටේ
රතු වුනු කට විහිදා හුරු සිනහව මැව් කලදි.............තුටේ
අමනාපෙන් බැලුවේ ඇයි අමතක විද බුලත්.............විටේ
වවා රැවුල කොන්ඩෙ බැඳන් බැනියම සහ සරම්....පොඩිය
ඇඳන් සසර පුරුද්දටම ඔබේ ලඟින් තැබිමි..............අඩිය
යන දවසෙත් යලිත් වැඩට බහක් නොදුන් නමුත්.....වැඩිය
බැඳි සෙනෙහස හද මඩලේ දැන් පෙරටත් වඩා.......දැඩිය
ගැවසුව දිනයක මුදු මල් රැළි ඇඹරුණු ඔය......කොන්ඩේ
සුවඳ දැනුනි තුරුළු සුවෙන් මාරු වෙද්දි ඒ............දන්ඩේ
නවතින්නම් මගෙ මැණිකට දෙවි පිහිටයි දැඩි......මුණ්ඩේ
කවදාවත් වෙනසක් නැති මං ආදර සුදු................බංඩේ
සමීර සෝමරත්න කිවිඳුන්ගේ නිර්මාණයකි. ඔහුගේ අවසරය මත උපුටාගෙන පලකරන ලද්දකි
(මගේ නොවන මගේ ආදරේ )
